නවගමුව බෝමිරිය රාස්සපාන ප්‍රදේශයේ විහාරස්ථානයක් නමින් නිවසක් පවත්වාගෙන ගිය පල්ලේගම සුමන නැමැති භික්ෂුව අද (08) දින අත් අඩංගුවට ගත් බව නවගමුව පොලිසිය පවසනවා.
ප්‍රදේශයේ කාන්තාවන් කිහිප දෙනෙකුට නොමනා ක්‍රියාවන් සිදු කළ බවට ප්‍රදේශවාසීන්ගෙන් ලැබී තිබූ පැමිණිලි මත එම භික්ෂුව පොලිසියට කැඳවා සාක්ෂි සටහන් කිරීමෙන් පසු අත් අඩංගුවට ගත් බවයි, සඳහන් වෙන්නෙ.
අත් අඩංගුවට ගත් සැකකාර භික්ෂුව කඩුවෙල මහේස්ත්‍රාත් අධිකරණය වෙත අද (08) දින ඉදිරිපත් කිරීමට නියමිතය බවයි, අප කළ විමසුමකදී පොලිසියේ නිලධාරියෙකු කියා සිටියේ.
ඉකුත් ජූලි මස 06 වන දින විහාරස්ථානයක් නමින් පවත්වාගෙන යන නිවසක කාමරයෙහි හිමිනමක සමඟින් කාන්තාවක හා තරුණියක ඉතා සමීපව සිටියදී, ප්‍රදේශවාසීන් විසින් ඔවුන් තම ග්‍රහණයට ගෙන තිබුණා. එහිදී යම් යම් හිරිහැර කරමින් අදාළ සිදුවීම වීඩියෝ ගත කොට සමාජ මාධ්‍ය වෙත මුදාහැරීමෙන් පසු මහත් ආන්දෝලනයකට ලක්වුණා.
ඉක්බිතිව පල්ලේගම සුමන නමැති මෙම හිමිනම නවගමුව පොලීසියට පැමිණිලි කරමින් පවසා තිබුණේ තමා හමුවීමට පැමිණි ඥාති මවක හා තරුණියක කාමරයේ සිටියදී, බලහත්කාරයෙන් කඩා වැදුණු පිරිසක් තමා ඇතුළු පිරිස නිරුවත් කොට පහරදුන් බවයි.
එම පැමිණිල්ලට අනුව වහා ක්‍රියාත්මක වන ලෙස මහජන ආරක්ෂාව හා පොලීසිය බාර අමාත්‍ය ටිරාන් අලස් විසින් ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන්ටත්, නවගමුව පොලීසියේ ස්ථානාධිපතිවරයාටත් උපදෙස් ලබාදුන් බවට ආරක්ෂක අමාත්‍යංශය විසින් නිකුත් කළ නිවේදනයක දැක්වුණා.
ඒ් අනුව වහාම ක්‍රියාත්මක වුණු පොලීසිය විසින් සැකකරුවන් 8 දෙනකු අත්අඩංගුවට ගත් අතර ඉකුත් 08 වන දින කඩුවෙල මහේස්ත්‍රාත් අධිකරණය හමුවට ඉදිරිපත් කළ ඔවුන් ජූලි මස 12 වන දින දක්වා රක්ෂිත බන්ධනාගාර ගත කෙරුණා.
මේ අතර, භික්ෂුන් වහන්සේ නමකට සහ කාන්තාවන් දෙදෙනෙකුට පහර දීමේ සිද්ධිය සහ එය නිරුවත් කර වීඩියෝ ගත කිරීම හෙළා දකින බව කාන්තා හා ළමා කටයුතු රාජ්‍ය අමාත්‍ය ගීතා කුමාරසිංහ මහත්මියද, පවසා තිබුණා.
අදාළ සිද්ධිය සම්බන්ධයෙන් අදහස් දක්වමින් රාජ්‍ය අමාත්‍යවරිය වැඩිදුරටත් පවසා තිබුණේ, “භික්ෂුවගේ විනය ප්‍රශ්න වෙන ම විසඳන්න ඕන. නමුත් කාන්තාවන් නිරුවත් කර පහර දුන් ආකාරය නින්දිතයි. කිසිම පුද්ගලයෙකුට එවැනි දෙයක් කිරීමට අයිතියක් නැහැ,” යනුවෙන්.
කෙසේ වෙතත්, ඇප ලැබුණු සැකකරුවන් මෙන්ම ප්‍රදේශවාසීන්ද, එක්ව මෙම භික්ෂුවගෙන් ප්‍රදේශයේ කාන්තාවන්ට සිදුවන අතවර සම්බන්ධයෙන් පොලීසියට පැමිණිලි කර තිබුණා.
අද දිනයේ පල්ලේගම සුමන හිමියන් මෙලෙස අත්අඩංගුවට පත්වන්නේ එලෙස ප්‍රදේශවාසීන්ගෙන් ලැබුණු පැමිණිලි මත බවයි, පොලීසිය පවසන්නෙ.