ශ්‍රී ලංකාවේ සිටින ප්‍රමුඛත ම ක්‍රිකට් දිරි ගන්වන්නා ලෙස සැලකෙන පර්සි අබේසේකර මහතා සම්බන්ධයෙන් පැතිර යන තොරතුරු සාවද්‍ය බව ඔහුගේ පවුලේ ආරංචි මාර්ග වෙත පැවසුවා.
මේ වන විට 87 හැවිරිදි වියේ පසුවන පර්සි අබේසේකර මහතා සැලකෙන්නේ එදා මෙදා තුර ශ්‍රී ලංකා ක්‍රිකට් ක්‍රීඩාව සතු වූ අංක එකේ දිරිගන්වන්නා ලෙසයි.
ශ්‍රී ලංකා ක්‍රිකට් ක්‍රීඩාව ටෙස්ට් ක්‍රිකට් බෞතීස්මය ලැබීමටත් පෙර සිංහ ධජය ගෙන පිටියේ හතරේ සීමාව ආක්‍රමණය කරමින් ශ්‍රී ලංකා ක්‍රිකට් ක්‍රීඩකයින් දිරිමත් කරන ‘පර්සි අංකල්’ මෙරට මෙන් ම ජාත්‍යන්තර තලයේ ද ක්‍රිකට් ප්‍රේක්ෂකයන්ට අමුතු දසුනක් නොවේ.
ඇතැම් අවස්ථාවල දී ඉතා ම අපහසු තත්ත්වයන් යටතේ වුව ද විදේශයන් තුළ දී ශ්‍රී ලංකා ක්‍රිකට් ක්‍රීඩාව මෙන් ම ක්‍රීඩකයන් වෙනුවෙන් ද පෙනී සිටිමින් සිදු කරනු ලබන කාර්යය අති මහත් එකක්.
පසු කලෙක ඔහුගේ අඩිපාරේ යමින් තවත් ක්‍රිකට් දිරිගන්වන්නන් පෙළක් ශ්‍රී ලංකා ක්‍රිකට් කණ්ඩායම වටා එක් රොක් වුව ද පර්සි අබේසේකර හෙවත් පර්සි අංකල් මෙරට ක්‍රිකට් ක්‍රීඩාව තුළ සලකුණු කළ නාමය ඒ කිසිවෙකුට සමකල නොහැකි වනු ඇත.
මේ වන විට තරමක අසනීප තත්ත්වයෙන් පසුවන පර්සි අංකල් ට සමස්ත ක්‍රිකට් ප්‍රජාව වෙනුවෙන් අපි විසින් ඉක්මන් සුව පතමු.
Post by @ceylonnewsfactoryView on Threads
