මෙවර ජනාධිපතිවරණය සඳහා තරඟවදින ජනාධිපති ධූර අපේක්ෂක පේමසිරි මානගේ විසින් මැතිවරණ කොමිසමේ නිලධාරීන් පිළිබඳව පැමිණිල්ලක් කර තිබෙනවා.
ඒ 17 වැනිදා තමන් පන්නෙගමුව ප්‍රදේශයේ සංචාරයක නිරත වු බවත්,එහිදි එම ප්‍රදේශයේ කාන්තාවන් පිරිසක් සාකච්ජාවක නිරතව සිටි බවත් සිය පැමිණිල්ලේ සදහන් කර තිබෙනවා. එම පිරිස වචන කිහිපයක් කතාකර යන ලෙස තමන්ගෙන් ඉල්ලීමක් කළ බවත්, එය ප්‍රතික්ෂේප කළ නොහැකි නිසා තමන් ඔවුන් හමු වි මද වේලාවක් කතාකර එම ස්ථානයෙන් පිටව ගිය බවත් පැමිණිල්ලේ දක්වා තිබේ. තමන් එම ස්ථානයෙන් පිටව ගිය පසු එම ස්ථානයට පැමිණ ඇති හම්බන්තොට මැතිවරණ කාර්යාලයේ නිළධාරීන් දෙදෙනෙකු හා පොලිස් නිළධාරීන් දෙදෙනෙකු එම ස්ථානයට පැමිණ තමා පිළිබදව විමසා ඇති බවත්, එම විමසිම තුළ තමා අපරාධකරුවෙකු ලෙස හුවා දක්වමින් තමාගේ කීර්ති නාමයට බලවත් හානියක් සිදුකර ඇති බවත් පවසයි.
මෙවර ජනාධිපතිවරණය සදහා තමා අපේක්ෂකයෙක් ලෙස ඉදිරිපත්ව සිටින බැවින් මැතිවරණ නිළධාරීන් පැමිණ එළෙස ප්‍රශ්ණ කිරීම හමුවේ එම අවස්ථාවේ එහි සිටි ජනතාවද භීතියට පත්ව ඇති බවත්, තවත් අයෙකු මේ අයුරින් අපහසුතාවයට පත්වන අයුරින් කටයුතු කිරීමට මැතිවරණ නිළධාරීන්ට කිසිදු අයිතියක් නොමැති බවත් සදහන් කරයි.
මේ සම්බන්ධයෙන් හම්බන්තොට මැතිවරණ ආරවුල් නිරාකරණ මධ්‍යස්ථානය පැවසුවේ පැමිණිල්ලක් සිදුකළ බව කියන අපේක්ෂකයා දිගින් දිගටම මැතිවරණ ආචාර ධර්ම කඩකිරිම සම්බන්ධයෙන් ලද පැමිණිලි කිහිපයකට අදාලව ඔහු හමුවට ගිය නමුත් ඔහු හමුවිය නොහැකි වු බවය. සිදුකර ඇති පැමිණිල්ලට අනුව කිසිදු අපහාසයක් හෝ ඔහුගේ මානව හිමිකම් කඩ කිරිමක් සිදු නොවු බවද මැතිවරණ ආරවුල් නිරාකරණය මධ්‍යස්ථානය සදහන් කරයි.