රටේ සියළු මුලික නීති කඩකරමින් දින 20ක් පුරා විල්පත්තු මායිමේ සංවිධානය කර ඇති අවුරා ලංකා සංගීත ප්‍රසංග මාලාවට එරෙහිව වූ පිරිසක් රාජාංගන පොලීසිය වෙත ගෙන්වීමට කටයුතු කර තිබෙනවා.
අවුරා ලංකා සමාගම විසින් කළ පැමිණිල්ලකට අදාළවයි ඔවුන් කැඳවා ඇත්තේ. සිය ප්‍රසංග මාලාවට එරෙහිව මෙම පිරිස කටයුතු කරන බවයි එම සමාගම පොලීසියට යොමුකළ පැමිණිල්ලේ සඳහන් වන්නේ.
මෙලෙස ගෙන්වා ඇත්තේ රාජංගනයේ ගොවි සංවිධාන, ගම සුරැකීමේ සංවිධානය, සහ ප්‍රදේශයේ බහුජන සංවිධාන ක්‍රියාකාරිකයින් පිරිසකි.
කෙසේ නමුත් අධිකරණ නියෝග කඩකරමින්, වනජීවි කලාපයක් තුළ, වනජීවි ඉඩමකට බලහත්කාරයෙන් ඇතුළු වී අඩුම තරමේ ශබ්දවිකාශන භාවිතය සඳහා අවසරවත් නොගෙන සිදුකරන්නට සැර යන මේ නීති විරෝධී සැණකෙළියට එරෙහිව ගොවි සංවිධාන සහ බහු ජන සංවිධාන නියෝජ්‍ය පොලිස්පතිවරයාට, පොලිස් අධිකාරීවරයාට සිදුකළ පැමිණිලිවලට කිසිම ප්‍රතිචාරයක් නොදක්වා ඇති බවයි වාර්තා වන්නේ.
එම සංවිධාන සඳහන් කරන්නේ මීට පෙර අදාළ සමාගමට සිදුකළ පැමිණිල්ලට කිසිඳු ප්‍රතිචාරයක් නොදැක්වූ පොලීසිය එම සමාගම විසින් සිදුකළ පැමිණිල්ලට වහා ක්‍රියාත්මක වීම පුදුම සහගතම කරුණක් බවයි.
මේ අතර අවුරා ලංකා සංගීත ප්‍රසංග මාලාව ඊයේ (10) රාජාංගනයේ දී ආරම්භ වූ අතර ප්‍රසංග මාලාව ලබන 29 වනදා දක්වා පැවැත්වීමට නියමිතයි.