පාසල්වල 2 වන ශ්‍රේණියේ සිට 11 වන ශ්‍රේණිය දක්වා සිසුන් ඇතුළත් කිරීම සඳහා නව ක්‍රමවේදයක් හඳුන්වා දීමට අමාත්‍ය මණ්ඩල අනුමැතිය හිමිව තිබේ.
ඊයේ (02)පැවති අමාත්‍ය මණ්ඩල හමුවේ දී අධ්‍යාපන අමාත්‍ය සුසිල් ප්‍රේම්ජයන්ත් මහතා විසින් ඉදිරිපත් කළ අදාළ යෝජනාවට එලෙස අනුමැතිය හිමිව ඇත.
අදාළ ක්‍රමවේදය 6 ශ්‍රේණියට අදාළ නොවන බව ද අමාත්‍ය මණ්ඩල තීරණ දැනුම්දෙමින් අමාත්‍ය බන්දුල ගුණවර්ධන මහතා පැවසීය.
ඒ අනුව දැනට ක්‍රියාත්මක චක්‍රලේඛ විධිවිධාන තවදුරටත් විධිමත් කරමින් අතරමැදි ශ්‍රේණිවලට පාසල් මාරු කිරීමට අවශ්‍ය කණ්ඩායම් හඳුනාගෙන සියලුම සිසුන්ට සාධාරණ හා සමප්‍රවේශ අවස්ථා සැලසෙන අයුරින් නව ක්‍රමවේදය හඳුන්වා දීමට නියමිතය.
ඒ අනුව දැනට පවතින 1 – 5 ශ්‍රේණිවල එක් පන්තියක උපරිම සිසුන් සංඛ්‍යාව 40ක් සහ 6 – 11 ශ්‍රේණිවල එක් පන්තියක උපරිම සිසුන් ගණන 45ක් ලෙසත් නව ක්‍රමවේදය යටතේ නොවෙනස්ව පවත්වාගෙන යෑමට නියමිතය.
මෙයට අදාළ චක්‍රලේඛය නොබෝ දිනකින් නිකුත් කිරීමට නියමිත බව ද අධ්‍යාපන අමාත්‍යවරයා සඳහන් කර තිබේ.