බටහිර නොවන ලෝකයේ නැගී එන බලපෑම ප්‍රදර්ශනය කිරීමේ අරමුණෙන් රුසියානු ජනපති ව්ලැද්මීර් පුටින් අද සිට ලබන 24 දක්වා රුසියාවේ Kazan හීදී BRICS සමුළුව ආරම්භ කරනවා.
එහි සාමාජික රටවල් නියෝජනය කරමින් චීන ජනපති ෂී ජින් පින්, ඉන්දීය අග්‍රාමාත්‍ය නරේන්ද්‍ර මෝදි ඇතුළු නැගී එන ලෝක බලවතුන් 20 දෙනෙක් එක් වීමට නියමිතයි.
BRICS යනු බ්‍රසීලය, රුසියාව, ඉන්දියාව, චීනය සහ දකුණු අප්‍රිකාව නියෝජනයෙන් ලත් සංවිධානයක්. බටහිර ප්‍රමුඛ ලෝකයට ප්‍රතිවිරෝධකයක් ලෙස බොහෝ විට හඳුන්වනු ලබන මෙම කණ්ඩායමට ඊජිප්තුව, ඉතියෝපියාව, ඉරානය සහ එක්සත් අරාබි එමීර් රාජ්‍යය ඇතුළත් කරගෙන තවත් පුළුල් වී තිබෙනවා.
සෞදි අරාබියටද ඒ සඳහා එක්වීමට ඔවුන් ආරාධනා කර ඇති බව සඳහන්.
මෙම සමුළුව ආරම්භ කිරීමට පෙර වාර්තා කරුවන් අමතමින් ජනපති පුටින් පවසා ඇත්තේ, BRICS යනු කිසිවකුට විරුද්ධ නොවන, සංවර්ධනය පිළිබඳ පොදු දැක්මක් සහ වඩාත් වැදගත් ලෙස එකිනෙකාගේ අවශ්‍යතා සැලකිල්ලට ගැනීමේ මූලධර්මය මත පදනම්ව එකට වැඩ කරන රාජ්‍යයන්ගේ සංගමයක් බවයි.
කෙසේ වෙතත් බටහිරයන් විසින් යුද අපරාධකරුවෙකු ලෙස හඳුන්වනු ලබන පුටින්ගෙන් චීනය, ඉන්දියාව, බ්‍රසීලය සහ අරාබි ලෝකයේ හවුල්කරුවන් යුක්‍රේනයේ යුද්ධය අවසන් කිරීමට ක්‍රමයක් සොයා ගන්නා ලෙස මෙහිදී ඉල්ලා සිටිනු ඇති.