ශ්‍රී ලංකා පොදුජන පෙරමුණේ, ජාතික සංවිධායක නාමල් රාජපක්ෂ මහතාට එරෙහිව ප්‍රවාහන අමාත්‍ය බන්දුල ගුණවර්ධන මහතා පොලිසියට පැමිණිල්ලක් සිදු කර තිබෙනවා.
ඒ, තමන්ට කිසිදු දැනුම්දීමකින් තොරව හෝමාගම ප්‍රදේශයේ රැස්වීමක් සංවිධාන කළ බව පවසමින්.
එලෙස සිදු කිරීමෙන් ඔහු පක්ෂ විනය කඩ කර ඇති බවයි, බන්දුල ගුණවර්ධන මහතා පෙන්වා දෙන්නේ.
කෙසේ වෙතත් මේ සම්බන්ධයෙන් තමන්ට ක්‍රියාත්මක වීමට නොහැකි බව ද පොලිසිය එහි දී සඳහන් කර තිබෙනවා.
මේ සම්බන්ධයෙන් අදහස් පළ කරමින් නාමල් රාජපක්ෂ මහතා කියා සිටියේ, හිටපු පළාත් සභා මන්ත්‍රී ජනක වැලිවත්ත මහතාගේ ආරාධනය පරිදි ඔහුගේ නිවසට පැමිණි බවයි.
ඒ අනුව එහි තේ පැන් සංග්‍රහයකටද සහභාගී වූ බවත් පාක්ෂිකයින් රැසක් තමා හමුවීමට පැමිණි බවත් ඔහු ප්‍රකාශ කළා.
එමෙන් ම බන්දුල ගුණවර්ධන මහතා පසුගිය කාලයේදීම නෙළුම් මාවතේ පක්ෂ කාර්යාලයට හෝ පැමිණ නොමැති බවයි දේශපාලන ආරංචි මාර්ග සඳහන් කළේ.