වර්ජනයට දින 70 යි – අනධ්‍යන කාර්ය මණ්ඩලය කබලෙන් ලිපට වැටෙයි !

2 Min Read

විශ්වවිද්‍යාල වැඩ වර්ජනයට සහාය පළ කරන අනධ්‍යයන කාර්ය මණ්ඩල සාමාජිකයන්ට මාස දෙකක වැටුප් ලැබී නැති බැවින් ආර්ථික දුෂ්කරතාවන්ට මුහුණ දී ඇතැයි වාර්තා වෙයි.

වැඩ වර්ජනය ආරම්භ කර මාස දෙකකට වඩා (දින 70ක්) ගතවී තිබෙන බැවින් එම සේවකයෝ වෙනත් වෘත්තීන්වලට යොමුව ආදායම් මාර්ග සපයා ගැනීමට පෙළඹී ඇතැයි ද දැන ගන්නට ලැබේ.

ඇතැමුන් ඉදි කිරීම් සමාගම්වල මෙන් ම ආපන ශාලාවල දෛනික වැටුපට සේවය කරන බව ද වාර්තා වෙයි.

එසේ ම, ඇතැමුන් කොස්, දෙල් මෙන් ම බුලත්විට වැනි ද්‍රව්‍ය විකුණා දෛනික ආදායම සපයා ගන්නා බව ද දැන ගන්නට ලැබේ.

කොළඹ, ජයවර්ධනපුර, සෞන්දර්ය කලා, කැලණිය ආදී කොළඹ අවට විශ්වවිද්‍යාලවල රාජකාරි කළ අනධ්‍යයන කාර්ය මණ්ඩල සේවකයෝ වියදම් දරාගත නොහැකිව ගම්වලට ගොස් ඇතැයි වාර්තා වෙයි.

අප්‍රේල් 8 වන දා අවසන් වැටුප ලැබුණු බව ත් මැයි සහ ජූනි මාසවල වැටුප් මෙන් ම මැයි මාසයේදී ලැබීමට නියමිත පෙබරවාරි මස අතිකාල දීමනාව ලබා ගැනීමට තිබෙන බව ත් වර්ජනයේ යෙදෙන සේවකයෝ පැවැසූහ.

ගතවූ කාලය තුළ ආදායමක් නොමැති වීමෙන් විය හියදම් සපුරා ගැනීමට නොහැකි වී ඇතැයි පැවැසූ ඔවුහු ආහාරපාන, ඹෟෂධ, දරුවන්ගේ අධ්‍යාපන කටයුතු, ණය වාරික, වාහන ලීසිං වාරික, විදුලි, ජල හා දුරකතන බිල් ඇතුළු නානාවිධ වියදම් පියවා ගැනීමට නොහැකිව අපහසුතාවන්ට මුහුණ දී ඇතැයි ද සඳහන් කළහ.

වැටුපක් නොමැතිව කොළඹ ජීවත්වීම අපහසු බැවින් ගම්වලට පැමිණි තමන් වැඩ වර්ජනය මෙහෙයවන වෘත්තීය සමිති වට්ස්ඇප් ගෘෘප්වලින් ඉවත් කර ඇතැයි ද ඔවුහු කීහ.

කොළඹ පැවැත්වෙන උද්ඝෝෂණවලට සම්බන්ධ නොවන බව කියමින් සති දෙකක කාලයක සිට එසේ වට්ස්ඇප් සාමුහිකයෙන් තමන් ඉවත් කර ඇතැයි ද එම සේවකයෝ පැවැසූහ.

වැඩ වර්ජනයට සම්බන්ධ අනධ්‍යයන කාර්ය මණ්ඩලවල මැයි හා ජූනි වැටුප් හා මැයි අතිකාල දීමනා ලබා දෙන බවට අධ්‍යාපන අමාත්‍යංශය සහ විශ්වවිද්‍යාල ප්‍රතිපාදන කොමිෂන් සභාව ලිපියක් මගින් දැනුම් තිබීම පිළිබඳව කළ විමසීමකදී විශ්වවිද්‍යාලයීය වෘත්තීය සමිති ඒකාබද්ධ කමිටුවේ සම සභාපති ධම්මික එස්. ප්‍රියන්ත මහතා සඳහන් කළේ, තමන්ගේ ඉල්ලීම් ලැබෙන තුරු අරගලය නතර නොකරන බව ය.

බලධාරීන් වැටුප් දෙන බව කීවාට වර්ජනය නතර නොකරන බව පැවැසූ හෙතෙම ආණ්ඩුව පළමුව වෘත්තීය සමිතිවල ඉල්ලීම් ඉටුකළ යුතු බව ත් ඉන් අනතුරුව වැඩ වර්ජනය පිළිබඳව තීරණයක් ගත හැකි බව ත් ප්‍රකාශ කළේ ය.

Share This Article
Leave a comment