පියුමිගෙ රේන්ජ් රෝවරය ගෝඨාභය පරිහරණය කළ එකක් – පියුමිගෙ වත්කම් විමර්ශනයෙන් අනාවරණය වූ දේවල් මෙන්න !

නිරූපන ශිල්පී පියුමි හංසමාලිගේ වත්කම් සම්බන්ධයෙන් අපරාධ පරීක්ෂණ දෙපාර්තමේන්තුවේ නීති විරෝධි වත්කම් විමර්ශන ඒකකය විමර්ශනයක් ආරම්භකර ඇත.

රුපියල් මිලියන 78කට රේන්ජ් රෝවර් වර්ගයේ ජීප් රථයක් මිලදී ගැනීම, රුපියල් මිලියන 148 කට කොළඹ 07 තට්ටු නිවාස සංකීර්ණයකින් නිවසක් මිලදී ගැනීම සහ බැංකු ගිණුම් 20ක් සම්බන්ධයෙන් මෙම විමර්ශනය ආරම්භකර තිබේ.

මේ ගැන අපරාධ පරීක්ෂණ දෙපාර්තමේන්තුව අද කොට්ඨාසය කොළඹ ප්‍රධාන මහේස්ත්‍රාත් අධිකරණයට කරුණු වාර්තාකරනු ලැබීය.

බැංකු ගිණුම් 20 ඇයටම අයත් ඒවා නොවන අතර එම ගිණුම්වලින් බහුතරයක් ඇගේ සමීපතයින්ගේය.

පියුමි හංසමාලි විශාල වත්කම් සහ ධනස්කන්දයකට මේ වනවිට උරුමකම් කියන බවත් එම වත්කම් මිලදී ගැනීම සදහා ඇති ආදායම් මාර්ගය බව විමර්ශනයේදී පෙනී ගොස් ඇත්තේ ඇයට අයත් රූපලාවන්‍ය භාණ්ඩ අලෙවි කිරීමේ ව්‍යාපාරයක් බවය.

ඉතා කෙටි කලක් තුළ ඇයට එම ආයතනයෙන් මෙතරම් විශාල ධනස්කන්දයක් උපයා ගැනීමට හැකියාව තිබේදැයි අපරාධ පරීක්ෂණ සැකකරමින් එම ආයතනය සම්බන්ධයෙන්ද අපරාධ පරීක්ෂණ දෙපාර්තමේන්තුව විමර්ශනයක් ආරම්කර ඇත.

පියුමි හංසමාලි සතුව ඇතැයි කියන රේන්ජ් රෝවර් රථය සම්බන්ධයෙන් කළ විමර්ශනයේදී අනාවරණය වී ඇත්තේ එය ඇය විසින් මිලදී ගෙන ඇත්තේ යම් සමාගමකින් බවය.

එම සමාගම් අධ්‍යක්ෂකවරයාගෙන් අපරාධ පරීක්ෂණ දෙපාර්තමේන්තුවේ නිලධාරීන් කළ ප්‍රශ්න කිරීමේදී අනාවරණය වී ඇත්තේ 2019 වසරේදී එංගලන්තයෙන් ආනයනය කළ එම රථය හිටපු ජනාධිපති ගෝඨාභය රාජපක්ෂ මහතාගේ පරිහරණයට ලබාදී තිබූවක් බවය.

එම වාහනය විකිණිමට පලකරනු ලැබූ දැන්වීමකට අනුව පියුමි හංසමාලි 2023 වසරේදී එය මිලදීගත් බවද අධ්‍යක්ෂවරයා වැඩිදුරටත් සඳහන් කර තිබේ.

කොළඹ 07න් සුපිරි නිවසක් පවා ඇය මිලදී ගෙන ඇත්තේද මේ කාලය තුළදී බව විමර්ශනවලින් හෙළිවී ඇත. එම නිවස මිලියන 148ක් වටිනා එකකි.

මෙවැනි තවත් විශාල වත්කම් ප්‍රමාණයක් පියුමි හංසමාලිට ඇති බවත් ඒ හැම වත්කමක් ගැනම විමර්ශන පවත්වමින් ඒවා නීත්‍යානුකූලව උපයාගත් ඒවාදැයි විමර්ශන පැවැත්වෙන බව අපරාධ පරීක්ෂණ දෙපාර්තමේන්තුව සඳහන් කරයි.