පොසොන් පොහොය නිමිති කරගනිමින් මිහින්තලය වෙත පැමිණෙන බැතිමතුන් වෙනුවෙන් ගාස්තු අය කිරීමකින් තොරව නොමිලේ ක්‍රියාත්මක වන විශේෂ දුම්රිය සේවාවක් හෙට සිට ආරම්භ කිරීමට කටයුතු කර ඇති බව දුම්රිය දෙපාර්තමේන්තුව පවසනවා.
මේ වනවිට උතුරු දුම්රිය මාර්ගයේ මහව-අනුරාධපුර ප්‍රදේශ අතර වැඩකටයුතු අවසන් වී නොමැති බැවින් මෙවර පොසොන් සමයට දුම්රිය සේවා යෙදවීමට නොහැකි වී ඇති බැවින් ඒ වෙනුවෙට විශේෂ බස් රථ පමණක් 400ක් අතිරේකව යෙදවීමට කටයුතු කර ඇති බවත් සඳහන්.
අනුරාධපුර සිට මිහින්තලය දක්වා නව කෙටි දුර දුම්රිය මාර්ගයක් ඉදිකර ඇති බවත් මිහින්තලය වන්දනා කිරීමට පැමිණෙන බැතිමතුන්ට ගාස්තු අය කිරීමකින් තොරව විශේෂ දුම්රියක් ධාවනය කිරීමට කටයුතු යොදන ලෙස දුම්රිය දෙපාර්තමේන්තුවට උපදෙස් ලබා දී ඇති බව ප්‍රවාහන සේවා අමත්‍යවරයාද දැනුම් දී තිබෙනවා.
කොළඹ සිට මහව දක්වා දුම්රියෙන් පැමිණෙන මගීන් හට මහව දුම්රිය ස්ථානයේ සිට අනුරාධපුර දක්වා ද විශේෂ බස් සේවාවක් ක්‍රියාත්මක වන බවත් සඳහන්.
අනුරාධපුර හා මිහින්තලය අතර දුම්රිය මාර්ගය ප්‍රතිසංස්කරණය කිරීමෙන් අනතුරුව විවෘත කිරීම හා මංගල දුම්රිය ධාවනය අද (17) පෙරවරුවේ ආරම්භ කිරීමටද නියමිතව තිබුණා.