රුසියානු හමුදාවට බැඳුණු ශ්‍රී ලාංකිකයින් 16 දෙනෙකු මියගොස් ඇති බවට මේ වන විට තහවුරු වී තිබෙනවා.
එවන් පසුබිමක මෙම අර්බුදයට මැදිව සිට ඉන් පළා ආ ශ්‍රී ලංකිකයෙකු සිය අත්දැකීම් මෙසේ ය.
කුරුණෑගල – කුඹුක්ගැටේ – කෝම්බුවේ පදිංචිව සිටි එරන්ද චින්තක තිලකරත්න ගොවිපොළක රැකියාවක් සඳහා රුසියාවට ගොස් තිබුණේ පසුගිය වසරේ ජනවාරි මස 18 වනදායි.
එම රැකියාවේ මාස 8ක පමණ කාලයක් නිරත වූ එරන්ද, එහි තිබූ කටුක බව නිසාම වෙනත් රැකියාවක් සොයමින් සිට ඇති අතර මිත්‍රයෙකු මාර්ගයෙන් ලැබුණු තොරතුරකට අනුව, මේ වසරේ ජනවාරි මස 10 වනදා රුසියානු හමුදාවට බැදි ඇත්තේ ඒ අනුවයි.
දින 12ක අවි පුහුණුවකින් පසු එරන්ද ඉදිරි ආරක්ෂක වළල්ලට යොමු කර තිබෙනවා.
එරන්ද පිළිබඳව මාස කිහිපයකින් කිසිදු තොරතුරක් නොමැති නිසා ඔහුගේ බිරිඳ දැඩි කම්පනයට පත්ව සිට ඇති අතර ඒ අතරතුර ඔහු යුක්‍රේන ප්‍රහාරයකින් තුවාල ලබා ඇත්තේ රුසියානු හමුදාවට එක් වී මාස 4යි දින 20කට පසුවයි. තත්ත්වය එසේ තිබියදී නහරයක් පුපුරා යාමෙන් එරන්දගේ බිරිඳ පසුගිය මාර්තු මස 29 වනදා ජීවිතයෙන් සමු ගෙන ඇත්තේ ඉතා අවාසනාවන්ත අයුරින්.
මේ අතර, තුවාල ලැබූ එරන්ද රෝහල් කිහිපයකටම මාරු කර යවා ඇති අතර, රුස්තව් හි රෝහලට යැවූ දින කෙසේ හෝ ඉන් මිදී යළි ලංකාවට ඒමට තීරණය කර තිබුණා. පසුව මිත්‍රයින්ගේද සහාය ඇතිව පසුගිය 09 වනදා එරන්ද ලංකාවට පැමිණ තිබෙනවා.
මේ අතර, රුසියානු හමුදාවට බැඳුණු ශ්‍රී ලාංකිකයින් 16 දෙනෙකු මියගොස් ඇති බව තහවුරු වී ඇතැයි ආරක්ෂක රාජ්‍ය අමාත්‍ය ප්‍රමිත බණ්ඩාර තෙන්නකෝන් ජනාධිපති මාධ්‍ය කේන්ද්‍රයේ ඊයේ පැවති ප්‍රවෘත්ති සාකච්ජාවකට එක්වෙමින් කියා සිටියා.
එවන් පසුබිමක ඩුබායි රාජ්‍යයේ රැකියාවලට පැමිණෙන මෙරට ශ්‍රමිකයින් වීසා අලුත් කර ගැනීම සඳහා ඕමානයට පිටත් කර යැවීමේදී සිදු කෙරෙන මුදල් ජාවාරමක් පිළිබඳව තොරතුරු හිරු ප්‍රවෘත්ති අංශයට වාර්තා වුණා.
එලෙස ගොස් මුදල් නොමැති වීම නිසා නැවත පැමිණීමට නොහැකිව ශ්‍රී ලාංකික ශ්‍රමිකයින් 20 කට ආසන්න පිරිසක් මේ වන විට ඕමානයේ රැදී සිටින බවයි වාර්තා වන්නේ. මෙම ජාවාරම ශ්‍රී ලාංකිකයින් 4 දෙනෙකු විසින් මෙහෙය වන බවට සිද්ධියට මුහුණදුන් පිරිස් පවසනවා.
මෙම ජාවාරමට හසුවූ කාන්තාවක් ඩුබායි රාජ්‍යයේ සිට කියා සිටියේ මුල්ලේරියාව ප්‍රදේශයේ පිහිටි විදේශ රැකියා ඒජන්සියක් පවත්වාගෙන යනු ලබන පුද්ගලයෙකුද මෙම ජාවරමට සම්බන්ධ බවටයි.