ගෝඨාභය කෘෂිකර්මාන්තයට කළ පාඩුව කෝටි විසි හතරදාහක් – වැවිලි, කෘෂි ලේකම්ලාට නඩු !

මහජන විරෝධය මත ධුරය අතහැර පලාගිය හිටපු ජනාධිපති ගෝඨාභය රාජපක්ෂ විද්‍යාත්මක සොයාබැලීමකින් තොරව හිතුමතේ සිදුකළ රසායනික පොහොර තහනම් කිරීම හේතුවෙන් රුපියල් කෝටි විසි හතර දහස් පන්සියයකට (රුපියල් 240,000,500) වඩා වැඩි පාඩුවක් සිදුවී ඇතැයි ඒ පිළිබඳව සිදුකළ අධ්‍යයනයක දී තොරතුරු අනාවරණය වී ඇති බව පේරාදෙණිය විශ්වවිද්‍යාලයේ ආර්ථික විද්‍යා හා සංඛ්‍යාන අධ්‍යයන අංශයේ මහාචාර්ය වසන්ත අතුකෝරල පවසයි.

එමෙන්ම රසායනික පොහොර තහනම් කිරීමෙන් අත්තනෝමතික තීරණය හේතුවෙන් වී සහ තේ නිෂ්පාදනය පසුගිය වසරේ දී පහළ ගිය බවද ඔහු පෙන්වා දෙයි.

මේ හේතුවෙන් එම වර්ෂයේ දී සෑම ගොවියෙකුටම දල වශයෙන් රුපියල් ලක්ෂයක පමණ පාඩුවක් සිදුව ඇතැයිද ඔහු සඳහන් කරයි.

පසුගිය වසරේ මහ කන්නයේ වී නිෂ්පාදනය පෙර වසරේ මහ කන්නයට සාපේක්ෂව 36%ක් වූ මෙට්‍රික් ටොන් එකොළොස් ලක්ෂ තිස් දහස් එකසිය හැට හතරකින්ද (1,130,164) යල කන්නයේ වී නිෂ්පාදනය 30%ක් වූ මෙට්‍රික් ටොන් හයලක්ෂ විසි හය දහස් පන් සිය විසි හතකින්ද (626,527) පහළ ගොස් ඇති බව මහාචාර්ය වසන්ත අතුකෝරළ පෙන්වාදෙයි.

රසායනික පොහොර තහනම හේතුවෙන් පසුගිය වසරේ තේ නිෂ්පාදනය මෙට්‍රික් ටොන් 47,000කට වැඩි ප්‍රමාණයකින් පහළ ගොස් ඇතැයි එම අධ්‍යයනයේ දී පෙනී ගිය බව පවසන මහාචාර්යවරයා එය ඊට පෙර වසරට සාපේක්ෂව 16%ක පමණ පහළ යෑමක් බව සඳහන් කරයි. තේ නිෂ්පාදනය එලෙස පහළ යෑමෙන් සිදු වූ මූල්‍යමය පාඩුව රුපියල් කෝටි හය දහස් අසූ හතරක් වූ බව සිය ගණනය කිරීම් අනුව අනාවරණය වූ බවද ඔහු පේනවාදෙයි.

පසුගිය වසරේ දී රබර් අපනයනය 1.8%කින්ද පොල් අපනයනය 5.9%කින්ද කුළු බඩු අපනයනය 18.9%කින්ද එලවලු අපනයනය 6.6%කින්ද පහළ ගොස් ඇති බව පැවසූ මහාචාර්ය අතුකෝරළ වැඩිදුරයත් පවසන්නේ විශාල විදේශ විනිමයක් මේ හේතුවෙන් රටට අහිමි වූ බවය.

අමාත්‍යංශ ලේකම්ලාට නඩු !

මේ අතර තමන්ට වූ පාඩුව අය කර ගැනීම වෙනුවෙන් කුඩා තේ වතු හිමියන් සහ ගොවි සංවිධාන කිහිපයක් අධිකරණයේ නඩු පැවරීමට සුදානම් වන බවට වාර්තා වේ.

ඒ එම තීරණය ගත් එවකට ජනාධිපති ගෝඨාභය ප්‍රමුඛ කැබිනට් මණ්ඩලය සහ එම තීරණය ක්‍රියාත්මක කළ කෘෂිකර්ම සහ වැවිලි කර්මාන්ත අමාත්‍යංශ ලේකම්ලාට විරුද්ධවයි.