පසුගියදා පැවති ෆොක්ස් හිල් (Fox Hill) මෝටර් රථ ධාවන තරඟය අතරතුර සිදුවූ අනතුරින් දිවි අහිමි වූවන්ට හා තුවාල ලැබූවන්ට වන්දි මුදලක් ලබාදීමට ක්‍රීඩා අමාත්‍යාංශ තීරණය කර තිබෙනවා.
ඒ අනුව දිවිය අහිමි වූ හත් දෙනා හට එක් අයකුට රුපියල් මිලියනය බැගින් ලබාදීමට තීරණය කර ඇති අතර තුවාල ලැබූ අයට 250,000 බැගින්ද ලබාදීමට තීරණය කර ඇති බවයි ක්‍රීඩා අමාත්‍යංශය නිවේදනය කළේ.
අදාළ තරගාවලියේදී මෝටර් රථයක් නරඹන්නන් වෙතට කඩා වැදීමෙන් පුද්ගලයින් හත් දෙනෙකු ජීවිතක්ෂයට පත්ව තවත් 23 දෙනෙකු තුවාල ලබා තිබෙනවා.
මෙම ඛේදජනක රිය අනතුරු සිදුකිරීමට සම්බන්ධ වූ මෝටර් රථ රියදුරන් දෙදෙනා මුලින් අත්අඩංගුවට ගෙන රක්ෂිත බන්ධනාගාරගත කළ නමුත් පසුව ඇප මත මුදා හැරිණි.
අනතුරට සම්බන්ධ තත්ත්වයන් අනාවරණය කර ගැනීමට සහ අනාගතයේදී එවැනි සිදුවීම් වළක්වා ගැනීම සඳහා මේජර් ජෙනරාල්වරයෙකුගේ නායකත්වයෙන් යුත් සත් පුද්ගල විමර්ශන මණ්ඩලයක් ද පත් කරන ලදී.