අදින් වසර පහකට පෙර මෙරට ඉතිහාසයේ අඳුරු දිනයක් උදා වුණා.
එනම් 2019 වසරේ අප්‍රේල් 21 දාට යෙදුනු පාස්කු ඉරුදින කුඩා දරුවන් ද ඇතුළු පුද්ගලයින් 277 දෙනෙකු මරණයට පත්කරමින්, ළමුන් සිය ගණනකට තම දෙමව්පියන්, නෑ හිතවතුන් අහිමි කරමින් මරාගෙන මැරෙන බෝම්බකරුවන් පිරිසක් ප්‍රහාරයක් එල්ල කිරීමේ ඛේදජනක සිද්ධියයි.
එම ප්‍රහාරයේ ඉලක්ක බවට කතෝලික හා ක්‍රිස්තියානි පල්ලි තුනක් ද, කොළඹ සුඛෝපභෝගී හෝටල් තුනක් ද පත් වී තිබුණු අතර පසුව විමර්ශනවල දී අනාවරණය වුණේ ඉස්ලාමීය අන්තවාදී කල්ලියක් විසින් මෙම මරාගෙන මැරෙන ප්‍රහාරය එල්ල කළ බවයි.
මේ අතර මෙම ප්‍රහාර මාලාවට අදාළ පිපිරීම් දෙමටගොඩ පිහිටි නිවාස සංකීර්ණයක ද, දෙහිවල පිහිටි ලැගුම්හලකින් ද වාර්තා වුණා.
ප්‍රහාරය සම්බන්ධයෙන් සිදු කළ විමර්ශනවල දී අනාවරණය වුණේ ප්‍රහාරය පිළිබඳ කලින් බුද්ධි තොරතුරු ලැබී තිබියදීත් ප්‍රහාරය ප්‍රහාරය වළක්වා ගැනීමට පියවර ගැනීමක් සිදු ව නැති බවයි.
කෙසේ වෙතත් මෙම ප්‍රහාරය එල්ල වූ දවසේ සිට මේ වන තුරු අගමැතිවරු තිදෙනෙක්, ජනාධිපතිවරු තිදෙනෙක්, ආණ්ඩු තුනක් පත් වූවත්, සිදුව ඇත්තේ ප්‍රහාරයට වසර පහක් ගත වීම හැර, ප්‍රහාරයේ වින්දිතයින්ට සාධාරණය ඉෂ්ඨ වීම නම් නොවෙයි.
පාස්කු ඉරුදින ප්‍රහාරය ගැන ඇසෙන නඩු
පාස්කු ඉරුදින ප්‍රහාරය සම්බන්ධයෙන් එක් ප්‍රධාන අපරාධ නඩුවක් කොළඹ මහාධිකරණය හමුවේ ගොනු කර තිබූ අතර, එහි දී ප්‍රහාරය සම්බන්ධයෙන් ‘කුමන්ත්‍රණය කිරීම, ආධාර අනුබල දීම ඇතුළු චෝදනා’ 23270 යටතේ විත්තිකරුවන් 24 දෙනකුට එරෙහිව නීතිපතිවරයා විසින් නඩු ගොනු කර තිබෙනවා.
එහි විත්තිකරුවන් ලෙස මොහොමදු ඊබ්‍රහිම් මොහොමදු නව්ෆර් හෙවත් නවුෆර් මවුලවි, මොහොම්මදු සරිබූ ආදම් ලෙබ්බේ (අබූ හදීක්), හයාතු මොහොමදු මිල්හාන් ( අබු සිලා), මොහොමදු ඊබ්‍රහිම් සාදික් අබ්දුල්ලා (අබු උමර්), මොහොමද් ඊබ්‍රහිම් අබ්දුල් හක් (අබූ ෆලා ), මොහොමඩ් අන්වර් මොහොමඩ් රිස්කාන් (අබු තාරික්), මොහොමඩ් මන්සූර් මොහොමඩ් සනස්දීන්( අබූ මිසාන්), අබ්දුල් මනාෆ් මොහොමඩ් පිරිදවුස්, මොහොමඩ් රමිෂ් මොහොමඩ් සාරික්, අබ්දුල් ලතීෆ් මොහොමඩ් සාෆි (සාෆි මවුලවි / අබූ ෆුර්කාන්) හුසේනූල් රිස්වි කාලිද් සමීර්, මොහොමඩ් සවාහීර් මොහොමඩ් හසන් (අබු දාවුද්), මොහොමඩ් ඉෆ්තිකාර් මොහොමඩ් ඉන්සාෆ් ( අබූ මොහොමඩ්), රෂීඩ් මොහොමඩ් ඉබ්‍රහිම්, මොහොමදු හනීෆා සෙයිනූල් ආබ්දීන් ( අබු හිනා), මොහොමඩ් මුස්තාපා මොහොමඩ් හාරිස් ( අබු නන්ජියාර්), යාසින් බාවා අබ්දුල් රවුෆ්, රසික් රාසා හුසේන්, කච්චි මොහොමඩ් ජෙස්මින්, සෙයිනූල් ආබ්දීන් මොහොමඩ් ජසීන්, මොහොමඩ් මුස්තාපා මොහොමඩ් රිස්වාන්, මීරා සහීඩ් මොහමඩ් නෆ්ලි (අබු සනා), මොහොමඩ් අමීන් අයන්තුල්ලා , මොහොමඩ් අක්‍රම් අහක්කම් යන අය නම් කර තිබෙනවා.
මේ අතර පාස්කු ඉරුදින ත්‍රස්ත ප්‍රහාරයක් එල්ල වන බවට බුද්ධි තොරතුරු ලැබී තිබියදීත් එය වළක්වා ගැනීමට කටයුතු නොකිරීමේ හානිය වෙනුවෙන් එවක ජනාධිපති මෛත්‍රිපාල සිරිසේන, එවක අග්‍රාමාත්‍ය වත්මන් ජනාධිපති රනිල් වික්‍රමසිංහ, එවක ආරක්ෂක අමාත්‍යංශ ලේකම් හේමසිරි ප්‍රනාන්දු, එවක පොලිස්පති පූජිත් ජයසුන්දර, එවක රාජ්‍ය බුද්ධි සේවයේ හිටපු ප්‍රධානී නිලන්ත ජයවර්ධන යන අයගෙන් වන්දි අයකර දෙන ලෙස ඉල්ලා ප්‍රහාරයෙන් වින්දිතයින් බවට පත්වූ පුද්ගලයින් 108 දෙනකු කොළඹ දිසා අධිකරණය හමුවේ නඩු ගොනු කර තිබුණා.
නමුත් එම නඩුවල වගඋත්තරකරුවකු ලෙස එවක අග්‍රමාත්‍යවරයා වූ වත්මන් ජනාධිපති රනිල් වික්‍රමසිංහ නම් කර තිබුණ ද, ඔහු ජනාධිපතිවරයා ලෙස තේරී පත්වීමෙන් අනතුරුව ආණ්ඩුක්‍රම ව්‍යවස්ථාවේ තිස් පස් වැනි වගන්තිය යටතේ ජනාධිපතිවරයාට එරෙහිව නඩු කටයුත්තක් පවත්වාගෙන යාමට නොහැකි හෙයින් ඔහු මුදා හැරීමට කොළඹ දිසා අධිකරණය නියෝග කළා.
මේ අතර මීගමුව කටුවාපිටිය දේවස්ථානයට එල්ල වූ ප්‍රහාරයෙන් මියගිය පුද්ගලයන්ගේ හා වින්දිතයින් බවට පත්වූ පුද්ගලයින් සහ ඔවුන්ගේ ඥාතීන් විසින් වන්දි ඉල්ලා නඩු 182ක් මීගමුව දිසා අධිකරණය හමුවේ ගොනු කර තිබුණේ, ඒවායේ විත්තිකරුවන් ලෙස හිටපු ජනාධිපති මෛත්‍රිපාල සිරිසේන, හිටපු පොලිස්පති පූජිත් ජයසුන්දර, හිටපු ආරක්ෂක ලේකම් හේමසිරි ප්‍රනාන්දු, රාජ්‍ය බුද්ධි සේවයේ හිටපු ප්‍රධානී නිලන්ත ජයවර්ධන යන අය නම් කරමින්.
තව ද එම ප්‍රහාරයක් එල්ල වන බවට බුද්ධි තොරතුරු ලැබී තිබියදීත් එය වළක්වා ගැනීමට කටයුතු නොකිරීම තුළින් සාපරාධී ලෙස රාජකාරිය පැහැරහැරීම, මිනීමැරීම ඇතුළු චෝදනා 850 බැගින් එල්ල කරමින් නීතිපතිවරයා විසින් හිටපු පොලිස්පති පූජිත් ජයසුන්දර සහ හිටපු ආරක්ෂක ලේකම් හේමසිරි ප්‍රනාන්දු යන අයට එරෙහිව කොළඹ ත්‍රිපුද්ගල මහාධිකරණ විනිසුරු මඩුල්ලක් හමුවේ වෙන වෙන ම නඩු දෙකක් ගොනු කර තිබූ අතර එම නඩු විභාග කළ ත්‍රිපුද්ගල මහාධිකරණ විනිසුරු මඩුල්ල අදාළ චෝදනා වලින් පූජිත් ජයසුන්දර සහ හේමසිරි ප්‍රනාන්දු නිදොස් කොට නිදහස් කිරීමට තීන්දු කළා.
එසේ ම පාස්කු ඉරුදින ත්‍රස්ත ප්‍රහාරයක් එල්ල වන බවට බුද්ධි තොරතුරු ලැබී තිබියදීත් එය වළක්වා ගැනීමට කටයුතු නොකිරීම සම්බන්ධයෙන් හිටපු ජනාධිපති මෛත්‍රීපාල සිරිසේන, හිටපු ආරක්ෂක ලේකම් හේමසිරි ප්‍රනාන්දු, හිටපු පොලිස්පති පූජිත ජයසුන්දර, රාජ්‍ය බුද්ධි සේවයේ හිටපු ප්‍රධානී නිලන්ත ජයවර්ධන ඇතුළු පිරිසකට එරෙහිව මූලික අයිතිවාසිකම් පෙත්සම් 12ක් ගොනු කෙරුණු අතර එහි තීන්දු ඉකුත් වසරේ ජනවාරි මස 12 වැනි දා ශ්‍රේෂ්ඨාධිකරණය විසින් ප්‍රකාශයට පත් කරනු ලැබූ අතර එහි දී මූලික මිනිස් අයිතිවාසිකම් උල්ලංඝනය කිරීම් වෙනුවෙන් හිටපු ජනාධිපති මෛත්‍රීපාල සිරිසේන විසින් රුපියල් මිලියන 100ක් ද, හිටපු පොලිස්පති පූජිත් ජයසුන්දර සහ රාජ්‍ය බුද්ධි සේවයේ හිටපු ප්‍රධානී නිලන්ත ජයවර්ධන විසින් රුපියල් මිලියන 75ක් බැගින් ද, හිටපු ආරක්ෂක ලේකම් හේමසිරි ප්‍රනාන්දු විසින් රුපියල් මිලියන 50ක් ද, හිටපු ජාතික බුද්ධි ප්‍රධානී සිසිර මෙන්ඩිස් විසින් රුපියල් මිලියන 10ක් ද වන්දි වශයෙන් ගෙවිය යුතු බවට ශ්‍රේෂ්ඨාධිකරණය තීන්දු කළා.
මේ ආකාරයෙන් පාස්කු ප්‍රහාරය සම්බන්ධයෙන් ගොනු කර තිබූ නඩු අතර, වන්දි නඩු 290ක්, මූලික අයිතිවාසිකම් පෙත්සම් 12ක්, ප්‍රධාන අපරාධ නඩු 3ක්, රාජකාරිය පැහැර හැරීම සම්බන්ධයෙන් නඩු 2ක් සහ වින්දිතයින් විසින් ගොනු කළ අපරාධ නඩු 1ක් ද වශයෙන් ගොනු කර තිබුණා.
දේශපාලන කුමන්ත්‍රණයක්?
මෙතරම් ප්‍රමාණයකින් පාස්කු ප්‍රහාරයට අදාළව නඩු විභාග වන පසුබිමක, ‘පාස්කු ප්‍රහාරය’ නිරන්තරයෙන් දේශපාලනික වශයෙන් මතු වෙමින් යට යමින් කලින් කලට දේශපාලන කරලිය රත් කළත්, මේ වනතුරු වසර පහක් මුලුල්ලේ වින්දිතයන්ට සාධාරණයක් සිදු වී නැහැ.
මේ අතර පාස්කු ප්‍රහාරයට වසර තුනක් පිරෙන දා එවක ජනාධිපති ගෝඨාභය රාජපක්ෂ නිවේදනයක් නිකුත් කරමින් පැවසුවේ, “ජාතික ආරක්ෂාව අනතුරේ හෙළා දමා තිබූ එකල රජයේ නොසැලකිල්ල මත එදා නිකරුණේ ජීවිතවලින් වන්දි ගෙවීමට සිදු වූයේ අහිංසක කිතුනු ජනතාවට ය.”
“මේ වන විට අපගේ රජය පත් වී වසර තුනකට ආසන්න ව තිබුණ ද මිනිසුන් 269 දෙනෙක් ජීවිතක්ෂයට පත් කරමින්, 400කට අධික පිරිසක් තුවාලකරුවන් බවට පත් කරමින් සිදු වූ පාස්කු ප්‍රහාරයේ වින්දිතයන්ට තවමත් යුක්තිය ඉටු වී නැතැයි නැඟෙන චෝදනා බොහෝ ය.”
තව ද එම නිවේදනය හරහා හිටපු ජනාධිපතිවරයා සඳහන් කර තිබුණේ, සැකකරුවන්ට දඬුවම් ලබා දිය හැක්කේ සාක්ෂි, සාධක විමසා බලා අධිකරණයකදී වරදකරුවන් වූ පසුව බවත්, එබැවින් මේ දක්වා ම විවිධ සාක්ෂි මත පදනම් ව සිදු කළ පරීක්ෂණවලින් පසු නුදුරේදී ම යුක්තිය ඉටු කරන බව ද ඒ සඳහා තමා බැඳී සිටින බවයි.
කෙසේ නමුත් ඔහුව මහජන අරගලයකින් බලයෙන් පහ කරන මොහොත වන විට ද පාස්කු ප්‍රහාරයේ වින්දිතයන්ට සාධාරණයක් ඉෂ්ඨ වූයේ නැහැ.
පාස්කු ඉරුදින ප්‍රහාරය ගැන චැනල් 4 අනාවරණය
පාස්කු ඉරුදින ප්‍රහාරය සම්බන්ධයෙන් ඉකුත් වසරේ සැප්තැම්බර් 5 වැනි දා රාත්‍රී 11.05ට එනම් ශ්‍රී ලංකා වේලාවෙන් සැප්තැම්බර් 6 වැනි දා අලුයම 3.35ට පමණ බ්‍රිතාන්‍යයේ චැනල් 4 නාලිකාව විසින් වාර්තා චිත්‍රපටයක් ප්‍රසිද්ධියට පත් කරමින් විමසා සිටියේ, “දේශපාලන බලය ලබාගැනීම සඳහා පුද්ගලයන් 269ක් ඝාතනය කළාද?” යන්නයි.
එම වාර්තා වැඩසටහනේ දී, ආරක්ෂාව පතා විප්‍රවාසීව සිටින අපරාධ පරීක්ෂණ දෙපාර්තමේන්තුවේ හිටපු පොලිස් පරීක්ෂකවරයෙකු වන නිශාන්ත ද සිල්වා, මාධ්‍යවේදිනී ෆෙඩ්රිකා ජැන්ස්, ඝාතනය කරන ලද මාධ්‍යවේදී ලසන්ත වික්‍රමතුංගගේ සොයුරු ලාල් වික්‍රමතුංග, මානව හිමිකම් කොමිසමේ හිටපු කොමසාරිස් අම්බිකා සත්කුනනාදන්, හිටපු රාජ්‍යතාන්ත්‍රිකයෙකු වන සරත් කොංගහගේ සහ කොළඹ අගරදගුරු අති උතුම් කාදිනල් මැල්කම් රංජිත් හිමිපාණන් මෙන් ම නම් හෙළිදරව් නොකරන රජයේ නිලධාරියෙකු ඇතුළු පිරිසකගේ හා වින්දිතයින් දෙදෙනෙකුගේ ප්‍රකාශ හා සාක්ෂි පදනම් කර ගෙන තිබුණා.
එම වාර්තා වැඩසටහනේ දී ප්‍රධාන සාක්ෂිකරුවෙකු ලෙස යොදා ගෙන ඇත්තේ රාජ්‍ය අමාත්‍යවරයෙකු වන සිවනේසන්තුරෛ චන්ද්‍රකාන්තන් නොහොත් පිල්ලෙයාන්ගේ හිටපු මාධ්‍ය ලේකම් ලෙස කටයුතු කළ, ජිවිත ආරක්ෂාව පතා දැනට රටින් පලා ගොස් සිටින හන්සීර් අසාද් මවුලානා නොහොත් අසාද් මවුලානා නැමැත්තායි.
ඔහු, හිටපු පොලිස් පරීක්ෂකවරයෙකු වන නිශාන්ත ද සිල්වා වැන්නන් එම වාර්තා වැඩසටහනේ මතු කරන කාරණා පාස්කු ඉරුදින ප්‍රහාරය සම්බන්ධයෙන් මූලික ප්‍රශ්න 3ක් මතු කරනවා. එනම්,
- ශ්‍රී ලංකා ඉතිහාසයේ සිදුවු දරුණුතම ත්‍රස්ත ප්‍රහාරයට පෙර හමුදා බුද්ධි අංශයේ ජ්‍යෙෂ්ඨ නිලධාරියෙක් ප්‍රහාරය සිදුකළ ඉස්ලාමීය අන්තවාදීන් රහසිගතව හමුවුණා ද?
- ත්‍රස්තවාදී කණ්ඩායම අත්අඩංගුවට ගැනීම වළක්වාලීම සඳහා හමුදා බුද්ධි අංශය පොලිසිය නොමඟ යැවුවා ද?
- ගෝඨාභය රාජපක්ෂගේ ආණ්ඩුව බෝම්බ ප්‍රහාර පිළිබඳ පරීක්ෂණ කඩාකප්පල් කරනු ලැබුවා ද? යන්නයි.
මේ අතර එම වාර්තා වැඩසටහන මගින් අනාවරණය කර සිටින ප්‍රධාන චෝදනා සම්බන්ධයෙන් නිවේදනයක් නිකුත් කරමින් හිටපු ජනාධිපති ගෝඨාභය රාජපක්ෂ සඳහන් කළේ, “චැනල් 4 නාලිකාවේ මෙම නවතම චිත්‍රපටය 2005 සිට පැවති රාජපක්ෂ පාලනයට මඩ ගැසීම අරමුණු කරගත් රාජපක්ෂ විරෝධී ප්‍රහාරයකි. මීට පෙර එම නාලිකාව විසින් ලංකාව ගැන විකාශනය කරන ලද චිත්‍රපට මෙන්ම මෙය ද බොරු ගොන්නකි. මා ජනාධිපති ධුරයට පත් කිරීම සඳහා ඉස්ලාමීය අන්තවාදීන් පිරිසක් මරාගෙන මැරෙන බෝම්බ ප්‍රහාර එල්ල කලා යැයි කීම අතිශයින් ම ජුගුප්සාජනකය.” යනුවෙන්.
එසේ ම එම වාර්තා වැඩසටහන හරහා චෝදනා එල්ල වන චෝදනා සම්බන්ධයෙන් රාජ්‍ය බුද්ධි සේවා ප්‍රධානී මේජර් ජෙනරාල් සුරේෂ් සලේ සිය නීතිඥයා හරහා ප්‍රතිචාර දක්වමින් සඳහන් කළේ, අදාළ හමුවීම් සිදුවීම් වූ බව කියන කාල වකවානුව තුළ තමන් මෙරටින් බැහැරව සිටි බව සහ පාස්කු ඉරුදින ප්‍රහාරයට තමාගේ කිසිදු සම්බන්ධයක් නොමැති බවයි.
තව ද එම චෝදනා ප්‍රතික්ෂේප කරන බව සිය නීතිඥයා මාර්ගයෙන් දැන් වූ මේජර් ජෙනරාල් සුරේෂ් සලේ සඳහන් කළේ, තමාට එරෙහිව එරෙහිව අසත්‍ය හා අපහාසාත්මක කරණු පළ කළහොත් සිවිල් ක්‍රියාමාර්ග ගන්නා බවයි.
මේ සියලු තත්ත්වයන් අතරවාරයේ, චැනල් 4 නාලිකාවේ වාර්තා වැඩසටහනෙන් ඉදිරිපත් වන චෝදනා සම්බන්ධයෙන් විමර්ශනය කිරීමට ජනාධිපති රනිල් වික්‍රමසිංහ විසින් කමිටුවක් පත් කිරීමට ද කටයුතු කළා.
නමුත් එයිනිදු වින්දිතයන්ට යුක්තිය ඉටු වීමක් සිදුව නැහැ.
මෛත්‍රීගේ ප්‍රකාශය
මේ අතර පාස්කු ඉරුදින ත්‍රස්ත ප්‍රහාරයට වසර පහක් සපිරෙන්න ආසන්නයේ දී පසුගිය දා (මාර්තු 22) එම ප්‍රහාරය සිදු වන අවස්ථාවේ දී එවක ජනාධිපතිවරයා වූ වත්මන් පාර්ලිමේන්තු මන්ත්‍රී මෛත්‍රීපාල සිරිසේන ආන්දෝලනාත්මක ප්‍රකාශයක් සිදු කළ අතර, එය දේශපාලන ලෝකයේ මෙන් ම කතෝලික ජනතාව ඇතුලු සමස්ත ජනයාගේ චෝදනාවට ලක් වුණා.
“පාස්කු ප්‍රහාරයත් අපි දන්නවා කොහෙන් ද සිද්ධ වුණේ කියලා. ඔය නඩු අහන ඒවා, ඒ අල්ලලා තියෙන ත්‍රස්තවාදියෝ, ඒක හරි. ඒ මම අල්ලපු අය තමයි දැන් ඔය නඩු අහන්නෙ ත්‍රිපුද්ගල විනිසුරු මඩුල්ලක් මගින්. අනිත් පැත්තෙන් ගත්තා ම ප්‍රධාන වශයෙන් ම පාස්කු ප්‍රහාරය සැබෑ ලෙස ම කළේ කවුද කියලා තව ම කිසි කෙනෙක් කියල නෑ. හැබැයි ඒක මම දන්නවා කවුද කළේ කියලා. මට අධිකරණයෙන් යම්කිසි ඉල්ලීමක් කළොත්, නැත්නම් නියෝගයක් කළොත් ඇවිල්ලා මට මේ ගැන ප්‍රකාශයක් කරන්න කියලා, මම ලෑස්තියි කවුද මේ පාස්කු ප්‍රහාරය කළේ කියන එක. අනික් කාරණය තමයි, ප්‍රධාන වශයෙන් ම එය ඉතාමත් රහසිගතව තබා ගැනීම ඒ විනිශ්චයකාරතුමන්ලාගෙත් වගකීමක් වෙනවා,”
පාස්කු ඉරුදින ප්‍රහාරය සම්බන්ධයෙන් වසර ගණනාවක් පුරා විවිධ කොමිෂන් සභාවලට සාක්ෂි දෙමින්, විවිධ නඩු විභාගවලට මුහුණ දෙමින් සිටි හිටපු ජනාධිපති මෛත්‍රීපාල සිරිසේන හදිසියේ කළ ප්‍රකාශය, දේශපාලන දේශපාලන උප්පරවැට්ටියක් බවට චෝදනා එල්ල වූ අතර, ප්‍රහාරය සිදු කළ අය දැන එය හෙළිදරව් නොකිරීමේ චෝදනාව මත ඔහුට එරෙහිව නීතිය ක්‍රියාත්මක කළ යුතුය යන්නත් ඔහුට එරෙහි මත ලෙස නැගී සිටියා.
අනතුරුව හිටපු ජනාධිපතිවරයා තමා කළ ප්‍රකාශය සම්බන්ධයෙන් අපරාධ පරීක්ෂණ දෙපාර්තමේන්තුව හමුවේ ප්‍රකාශයක් ලබා දුන් අතර, මාධ්‍ය වෙත අනාවරණය වූයේ පාස්කු ඉරුදින ත්‍රස්ත ප්‍රහාරයට රාජ්‍ය තාන්ත්‍රික සම්බන්ධතාවක් ඇති බවට ඔහු විසින් අපරාධ පරීක්ෂණ දෙපාර්තමේන්තුව හමුවේ හෙළිදරව් කර ඇති බවයි.
මේ කුමන තත්ත්වය යටතේ වුව ද පාස්කු ඉරුදින ත්‍රස්ත ප්‍රහාරය යනු කලින් කලට දේශපාලන ලෝකය තුළ දඩමීමා වන මාතෘකාවක් වී ඇති බව නොරහසක් වන අතර ඒ රුදුරු ප්‍රහාරයෙන් මිය ගිය 277ක් දෙනා මෙන් ම, තුවාල ලැබූ, ආබාධිත වූ සහ පූර්ණ ආබාධිත වූ 407ක පිරිසට ඔවුන්ගේ පවුල්වල අයට ‘යුක්තිය හා සාධාරණය’ යනු වසර පහක් මුලුල්ලේ හුදු වචන දෙකක් පමණක් ම වී තිබෙන බව අමුතුවෙන් කිව යුත්තක් නොවෙයි.