එහි දී එම පනතට පක්ෂව ඡන්ද 108ක් ලැබුණු අතර විපක්ෂව ලැබුණේ ඡන්ද 62ක් පමණයි.
මෙම පනත් කෙටුම්පත පිළිබඳ විවාදය ඊයේ (23) ආරම්භ වූ අතර, ඊයේ දිනයේ පනත් කෙටුම්පත විවාදයට ගැනීම සම්බන්ධයෙන් පාර්ලිමේන්තුවේ ඡන්ද විමසීමක් ද පැවැත් වුණා.
එහි දී වැඩි ඡන්දයෙන් තීරණය වූයේ කෙටුම්පත විවාදයට ගැනීමටයි.
එහි දී විවාදයට පක්ෂව ඡන්ද 83ක් ලැබුණු අතර විපක්ෂව ලැබුණේ ඡන්ද 50ක් පමණයි ඒ අනුව පනත් කෙටුම්පත පිළිබඳ විවාදය ආරම්භ වුණා.
මහජන ආරක්ෂක අමාත්‍ය ටිරාන් අලස් මහතා විසින් මාර්ගගත ක්‍රමවල සුරක්ෂිතභාවය පිළිබඳ පනත් කෙටුම්පත පළමු වර කියවීම සඳහා ඉකුත් දා පාර්ලිමේන්තුවට ඉදිරිපත් කරනු ලැබුවේ, පාර්ශව රැසක් මේ පනත් කෙටුම්පත පිළිබඳව දැඩි විරෝධයක් එල්ල කර ඇති පසුබිමකයි.
එවන් තත්ත්වයක් යටතේ සම්මත වූ මෙම පනත් කෙටුම්පත සම්බන්ධයෙන් මේ ආකාරයෙන් විමසා බැලිය හැකියි.
පනතේ අඩංගු මූලික කරුණු
මෙම පනත් කෙටුම්පත යටතේ මූලිකවම සිදු කෙරන කාරණාවන් වන්නේ,
- මාර්ගගත ක්‍රමවල සුරක්ෂිත භාවය පිළිබඳ කොමිෂන් සභාව පිහිටුවීම
- ශ්‍රී ලංකාව තුළ සිද්ධියක් පිළිබඳ ඇතැම් ප්‍රකාශ මාර්ගගත ලෙස සන්නිවේදනය කිරීම තහනම් කිරීමට විධිවිධාන සැලසීම
- තහනම් කාර්ය සඳහා මාර්ගගත ගිණුම් සහ ව්‍යාජ මාර්ගගත ගිණුම් භාවිතය වැළැක්වීම
- ශ්‍රී ලංකාව තුළ තහනම් කාර්ය සඳහා භාවිත කරනු ලබන මාර්ගත ස්ථාන හඳුනා ගැනීම සහ ප්‍රකාශයට පත් කිරීම සඳහා විධිවිධාන සැලැස්වීම
- සිද්ධියක් පිළිබඳ අසත්‍ය ප්‍රකාශ සන්නිවේදනය කිරීමට මුදල් සැපයීම සහ අනෙකුත් ආධාර ලබා දීම මැඩපැවැත්වීම යනාදියයි.
සම්මත වූ පනත් කෙටුම්පත යටතේ ‘ වැරදි ලෙස අර්ථ’ ගන්වා ඇත්තේ මොනවාද?
මෙම පනත් කෙටුම්පත ඔස්සේ මාර්ගගත ක්‍රම ඔස්සේ සිදු කරනු ලබන වැරදි ලෙස අර්ථ ගන්වා ඇති තත්ත්වයන් මෙසේයි.
එනම්,
- ශ්‍රී ලංකාව තුළ සිද්ධියක් පිළිබඳ අසත්‍ය ප්‍රකාශ සන්නිවේදනය කිරීම
- අපහාසයට හේතුවන අසත්‍ය ප්‍රකාශ සිදු කිරීම
- අසත්‍ය ප්‍රකාශ මඟින් කැරලි ගැසීමක් සිදු කිරීම සඳහා නිකරුණේ ප්‍රකෝප කරවීම
- අසත්‍ය ප්‍රකාශ මඟින් ආගමික රැස්වීමකට බාධා කිරීම
- ආගමික හැඟීම්වලට රිඳවීමේ ඒකාන්ත චේතනාවෙන් අසත්‍ය ප්‍රකාශයක් සන්නිවේදනය කිරීම
- ආගමික හැඟීම් නිග්‍රහයට පාත්‍ර කිරීම සඳහා ඒකාන්තයෙන් සහ ද්වේශ සහගත ලෙස අසත්‍ය ප්‍රකාශයක් සන්නිවේදනය කිරීම
- මාර්ගගත ක්‍රම හරහා අසත්‍ය සන්නිවේදනය කිරීමෙන් වංචා කිරීම
- අනෙකෙකු ලෙස පෙනී සිටීමෙන් වංචා කිරීම
- සාමය කඩ කිරීමක් සිදු කිරීම සඳහා ප්‍රකෝප කරවීමේ චේතනාවෙන්ම අසත්‍ය ප්‍රකාශයක් මඟින් චේතනාන්විතවම නින්දා කිරීම
- කැරැල්ලක් හෝ රජයට විරුද්ධව වරදක් ආදිය සිදුකිරීමට සැලැස්වීමේ චේතනාවෙන් අසත්‍ය ප්‍රකාශයක් සංසරණය කිරීම
- හිරිහැර සිදුකිරීම සඳහා සිද්ධි පිළිබඳ ප්‍රකාශ සන්නිවේදනය කිරීම
- ළමා අපයෝජන
- වරදක් සිදු කිරීම සඳහා ‘බොට්’ සෑදීම හෝ අවභාවිතා කිරීම
- කොමිෂන් සභාවේ විධානයකට අනුකූලව කටයුතු කිරීම පැහැර හැරීම යනාදියයි.
දඬුවම් මොනවා ද?
ඉහත සඳහන් කළ වරදවල් යටතට ගැනන වරදක් යමෙන් සිදු කර ඇත්නම්, පුද්ගලයකු බන්ධනාගාරගත කිරීමකට හෝ දඩයකට යටත් කිරීම සහ එම දඬුවම් දෙකටම යටත් කිරිමේ හැකියාව පවතිනවා.
විරෝධතා මතු වීමට හේතු
මෙම පනතට විරෝධය දක්වන පාර්ශව මතුකරන කාරණයක් වන්නේ, මෙම පනත් කෙටුම්පත හරහා ඔන්ලයින් මගින් සේවා සපයන්නන් හට දඬුවම් කිරිමේ හැකියාවක් පවතින අතර, එමඟින් සේවා සැපයිම අඩාලවීමේ අවදානමක් පවතින බවයි.
එසේ ම සමාජ මාධ්‍ය හරහා ව්‍යපාරවල නිරත පුදගලයන් හට ද මෙම පනත හරහා ගැටලු ඇතිවීමේ ඉඩ පවතින බවත් විචාරකයින් මතුකරන තවත් කරුණක්.
මේ අතර මෙම පනත් කෙටුම්පත හරහා පිහිටුවනු ලබන, අදාළ කොමිසමේ සියලු සාමාජිකයන් පත් කිරීමේ බලය ජනාධිපතිවරයා සතුවීම, කොමිෂන් සභාවේ ස්වාධීනත්වය කෙරෙහි බලපාන තවත් කරුණක් බව ද මෙම කෙටුම්පතට විරෝධය දක්වන පාර්ශව පෙන්වා දෙනවා.
මෙම කොමිසමට ප්‍රකාශවල සත්‍යාසත්‍යතාව තීරණය කිරීමට ඉඩ ලබාදීම හරහා භාෂණයේ හා ප්‍රකාශයේ නිදහසට බලපෑම් සිදුවීමේ ඉඩක් ඇතිවීමේ අවදානමක් පවතින බව ද ඔවුහූ පෙන්වා දෙන තවත් කරුණක්.
මෙවැනි තත්ත්වයන් හේතු කොටගෙන මෙම පනත් කෙටුම්පතට එරෙහිව පාර්ලිමේන්තුව තුළත්, සිවිල් සමාජ අවකාශය තුළත් විරෝධතා මතු වුවත්, අද (24) දිනයේ දී පාර්ලිමේන්තුවේ දි පැවති දෙවැනි වර කියවීමේ විවාදයට අදාළ ඡන්ද විමසීමේ දී එය වැඩි ඡන්ද 46කින් සම්මත වුණා.
පනත සම්මත කරගැනීමේ පාර්ලිමේන්තු ජන්ද විමසීම
