පාසලේ ජල කරාමය සවි කළ කොන්ක්‍රීට් බිත්තියක් කඩා වැටී දැරියකට දිවි අහිමි කළ සිද්ධියත් සමග උරණ වූ පුද්ගලයෙකුගේ පහර කෑමට ලක් වූ එම විදුහලේ විදුහල්පතිවරයා ඇසට සිදුවූ තුවාලත් සමග කොළඹ අක්ෂි රෝහලට ඇතුළත් කර ඇත.
ඛේදවාචකය සිදුවූ ඊයේ (15) දිනයේ වැල්ලම්පිටිය වේරගොඩ විද්‍යාලයේ විදුහල්පතිවරයාගේ උපන් දිනය යෙදී තිබුණු දිනය බව වාර්තා වේ.
විදුහල්පතිවරයා ඒ වෙනුවෙන් දරු දරියන්ට සුළු සංග්‍රහයක් ද කර තිබේ. මෙම අනපේක්ෂිත අනතුරත් සමග පාසල තුළ කලබලකාරී තත්ත්වයක් ඇති වී තිබේ. ඒ තත්ත්වය පාලනය කරගෙන සිසු පිරිසගේ ආරක්ෂාව තහවුරු කරගැනීම සදහා පාසලේ ප්‍රධාන ගේට්ටුව වැසීමට විදුහල්පතිවරයා කළ නියෝගයට උරණ වූ අයෙක් මෙම පහරදීම සිදුකර ඇතැයි විමර්ශන කණ්ඩායම් කියයි.
පාසල තුළ ඇතිවූ තත්ත්වය සමතයකට පත් කරන්නට ග්‍රෑන්ඩ්පාස් හා දෙමටගොඩ පොලිස් නිලධාරීන්ට අමතරව, පොලිස් විශේෂ කාර්ය බළකා නිලධාරීන්ද විදුහලට කැඳවීමට පියවර ගෙන තිබිණි.
පාසල් විවේක කාලය තුළ ඊයේ උදේ 10.30ට පමණ වැල්ලම්පිටිය, වේරගොඩ කණිෂ්ඨ විද්‍යාලයේ බැම්මක් කඩා වැටීමෙන් 1 වසරේ අධ්‍යාපනය ලබන 6 හැවිරිදි සිසුවියක් මියගොස් තවත් දරු දැරියන් 05 දෙනෙකු මෙලෙස තුවාල ලබා තිබුණි.
එමෙන්ම අදාල සිද්ධිය සම්බන්ධයෙන් විමර්ශනයක් ආරම්භ කරන ලෙස අධ්‍යාපන අමාත්‍යාංශය, අධ්‍යාපන බලධාරීන්ට උපදෙස් දී තිබෙනවා.
ඒ අනුව, කලාප අධ්‍යාපන කාර්යාලයේ නිලධාරීන් වෙත ඒ සම්බන්ධයෙන් විමර්ශනය සිදු කර කඩිනමින් වාර්තාවක් ලබාදෙන ලෙසයි, අධ්‍යාපන අමාත්‍ය සුසිල් ප්‍රේමජයන්ත මහතා උපදෙස් දී ඇත්තේ.
මේ අතර, ඉදිරියේ දී අදාළ පාසල වෙත ගොස් සිද්ධිය සම්බන්ධයෙන් විමර්ශනයක් ආරම්භ කිරීමට කටයුතු කරන බව ද ජයවර්ධනපුර කලාප අධ්‍යාපන අධ්‍යක්ෂ කාර්යාලය පවසනවා.
පාසලේ ඇති වූ නොසන්සුන්තාව හේතුවෙන් එම පාසලේ අධ්‍යයන කටයුතු තාවකාලික ව නවතා දමා ඇති අතර, එහි යළි අධ්‍යයන කටයුතු ලබන සඳුදා සිට සිදු කිරීමට නියමිතයි.