තම ප්‍රදේශයේ පාසලක පැවැත්වෙන උත්සවයකට පැමිණෙන ජනාධිපතිවරයා ඝාතනය කිරීම සඳහා ස්නයිපරයක් අවශ්‍ය බව පවසමින් මුහුණු පොතේ සටහනක් දැමීම සම්බන්ධයෙන් අත්අඩංගුවට ගත් තරුණයෙකු ලබන 08 වනදා දක්වා රක්ෂිත බන්ධනාගාර ගතකර තිබෙනවා.
කොළඹ ප්‍රධාන මහේස්ත්‍රාත් ප්‍රසන්න අල්විස් මෙලෙස රක්ෂිත බන්ධනාගාර ගත කෙරුණේ එප්පාවල – මැඩියාව ප්‍රදේශයේ පදිංචි 19 හැවිරිදි තරුණයෙක්.
අපරාධ පරීක්ෂණ දෙපාර්තමේන්තුව මගින් මොහුව අත්අඩංගුවට ගෙන අධිකරණයට ඉදිරිපත් කෙරුණු අතර වෘත්තියෙන් මොහු චූන්පාන් වෙළදාමේ නිරත වන අයෙකු බවටයි අනාවරණ වුණේ.
උතුරු මැද පළාතේ පැරණිතම පාසල වන එප්පාවල ශ්‍රී සිද්ධාර්ථ ජාතික පාසලේ 150 වැනි සංවත්සර සැමරුම වෙනුවෙන් එළැඹෙන 07 වන දින පස්වරු 03.00 ට ජනාධිපති රනිල් වික්‍රමසිංහ මහතා සහභාගී වීමට නියමිත අතර එහිදී එප්පාවල ශ්‍රී සිද්ධාර්ථ ජාතික පාසලේ 150 වැනි සංවත්සරය වෙනුවෙන් සමරු මුද්දරයක් ද නිකුත් කිරීමට නියමිතයි.
එහිදී එප්පාවල ශ්‍රී සිද්ධාර්ථ ජාතික පාසලේ 150 වැනි සංවත්සර සැමරුමට සමගාමීව සැප්තැම්බර් මස 05/06 දෙදින විද්‍යාල පරිශ්‍රයේ දී අධ්‍යාපනික ප්‍රදර්ශනයක්, 06 වැනි දින පස්වරු 06.00 ට ධර්ම දේශණාවක්, සැප්තැම්බර් මස 07 වැනි දින දහවල් එකසිය පනස් නමක් විෂයෙහි දානමය පිංකමක් හා පස්වරුවේ ජනාධිපතිතුමන්ගේ සම්ප්‍රාප්තිය හා සමරු මුද්දරය නිකුත් කිරීම, සැප්තැම්බර් මස 08 දින පෙරවරුවේ රථ පෙළපාලිය හා පාගමනක් මෙන්ම එදින පස්වරුවේ සංගීත ප්‍රසංගයක් මෙන්ම, සැප්තැම්බර් මස 09/10 දෙදින ආදී සිසු ක්‍රිකට් තරඟාවලියක් ද ලෙස සැමරුම උත්සව මාලාවක් සංවිධානය කර ඇත.
එම උත්සවය වෙනුවෙන් එළැඹෙන 07 වැනි දින ජනාධිපතිතුමන් සහභාගී වීමට සිටින පසුබිමක අදාළ තරුණයා විසින් ඊයේ (03) දින පෙරවරුවේ තම Facebook පිටුවේ,
මේ කවුරු හරි ලඟ තියෙනවාද ස්නයිපර් එකක් සැප්තැම්බර් 17 වැනිදාට ගන්න එප්පාවලට රට කාපු ලොකුම කාලකන්නි හොරා එනවා ඌට වෙඩි තියන්න
යනුවෙන් සටහනක් තබා ඇත. එම සටහන සම්බන්ධයෙන් බුද්ධි අංශ නිළධාරීන්ට තොරතුරු ලැබීමෙන් අනතුරුව පරීක්ෂණ සිදු කිරීම සඳහා ඔහු එප්පාවල පොලීසියට කැඳවා කරුණු විමසා ඇත. මේ සම්බන්ධයෙන් වැඩිදුර පරික්ෂණ සිදු කිරීම සඳහා අදාළ තරුණයා ඊයේ (03) රාත්‍රියේම කොළඹ පිහිටි අපරාධ පරීක්ෂණ දෙපාර්තමේන්තුව වෙත රැගෙන ගොස් ඇත.
මේ වන විට අදාළ සටහන ද එම තරුණයා විසින් සිය Facebook ගිණුමෙන් ඉවත් කරගෙන ඇත.
ඔහුගෙන් කළ ප්‍රශ්න කිරීම වල දී ජනාධිපතිවරයා ඝාතනය කිරීමේ සැලසුමක් හෝ අවශ්‍යතාවක් ඔහුට නොපවතින බව ද අනාවරණය වී ඇත. අදාළ තරුණයාගේ පියා කුලී රථ රියදුරකු ලෙස සේවය කරන බවත් ඔවුන් අපරාධ සඳහා සම්බන්ධ පුද්ගලයින් නොවන බවත් අනාවරණය වී ඇත.
අදාළ තරුණයාගෙන් ස්නයිෆර් ගැන දන්නේ කෙසේදැයි විමසා ඇති අතර, තමන් PUBG වැනි පරිගණක හා ජංගම දුරකථන ක්‍රීඩා සිදු කරන බවත්, ඒවායේ දුර සිටින පුද්ගලයින් ඝාතනය කිරීම සඳහා ස්නයිෆර් යොදා ගන්නා බවත් පවසා ඇත.
තමන් මෙම ෆේස්බුක් සටහන දුරදිග නොසිතා දැමුවක් බව ද ඔහු පවසා ඇත. අදාළ තරුණයා පරිගණක හා ජංගම් දුරකථන ක්‍රීඩා සඳහා තදින් ඇබ්බැහි වූවෙකු බව ද පරීක්ෂණ නිළධාරීන් පවසයි.
මේ අතර, අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නේ එප්පාවල ප්‍රදේශයේ පදිංචි කිළිනොච්චිය යුද හමුදා කඳවුරට අනුයුක්තව සේවය කරන සෙබලෙකු ටී 56 ගිනි අවියක් සහ ඊට යොදන උණ්ඩ 120 ක් සමගින් පළාගොස් තිබූ බවයි.
ඔහු මේ වනවිට අත්අඩංගුවට ගෙන ඇති අතර ගිනි අවිය රැගෙන ගියේ සිය බිරිඳ සමග සම්බන්ධතාවක් පවත්වන පුද්ගලයෙකු ඝාතනය කිරීමට බව ඔහු පොලිසියට ප්‍රකාශ කර තිබෙනවා.
කෙසේ වෙතත් දැනට අත්අඩංගුවේ පසුවන 19 හැවිරිදි තරුණයා ගිනි අවියක් අවශ්‍ය බවට මුහුණු පොතේ පළ කළ සටහනට පසු දින මෙම යුද හමුදා සෙබළා අදාළ ගිනි අවියක් රැගෙන පළාගොස් තිබූ බව අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නා.
එබැවින් මෙම සිද්ධීන් දෙක අතර සම්බන්ධතාවයක් පවතින්නේද යන්න පිළිබඳවද විමර්ශන ආරම්භ කර ඇති බවයි පොලිසිය කියා සිටියේ.