රඹුක්කන, බෝලගම, කොටගම හන්දියේ දී රඹුක්කන පොලිස් ස්ථානයේ නිලධාරීන් විසින් යොදා තිබූ මාර්ග බාධකය අසලදී පොලිස් අණ නොතකා යතුරුපැදියක් ධාවනය කළ පුද්ගලයෙකුට අද අලුයම පොලිසිය විසින් වෙඩි තබා තිබෙනවා.
වෙඩි වැදීමෙන් එම පුද්ගලයාගේ වම් අතට සහ වම් පාදයට තුවාල සිදුවී ඇති බවයි පොලිසිය සඳහන් කළේ.
තුවාල ලැබූ පුද්ගලයා මේ වනවිට කෑගල්ල ශික්ෂණ රෝහලේ හදිසි ප්‍රතිකාර ඒකකයේ ප්‍රතිකාර ලබනවා.
රඹුක්කන ප්‍රදේශයේ පදිංචි බජන් නැමැති පුද්ගලයෙකු විසින් අලුයම් කාලයේ හෙරොයින් ප්‍රවාහනය කරන බවට ලද තොරතුරක් මත ඔහුව අත්අඩංගුවට ගැනීම සදහා පොලිස් මාර්ග බාධකය යොදා තිබූ අතර, එම අවස්ථාවේ අණ නොතකා ධාවනය කල පුද්ගලයා බජන් නැමැත්තා බවට ඇති වූ සැකය මත මෙම වෙඩි තැබීම සිදු කර ඇති බවයි වැඩිදුරටත් අනාවරණ වී ඇත්තේ.