කෝටි අටක රත්තරන් සහ හොර බඩු ගෙනා මන්ත්‍රී අලි සබ්රි රහීම් නිදහස් – රටට පැමිණ ඇත්තේ ජනක එලවන්න ජන්දය දෙන්න !

3 Min Read

ප්‍රකාශ නොකළ රත්‍රං කිලෝ තුනහමාරක් රැගෙන පැමිණ කටුනායක ගුවන් තොටුපොළේදී ඊයේ (23) අත්අඩංගුවට ගත් පුත්තලම දිස්ත්‍රික් පාර්ලිමේන්තු මන්ත්‍රි අලි සබ්රි රහීම් රුපියල් මිලියන7.5ක දඩ මුදලක් මත නිදහස් කර තිබෙනවා.

එමෙන්ම ඔහු සන්තකයේ තිබූ රත්‍රං කිලෝ 3.5ක ප්‍රමාණය සහ ජංගම දුරකථන 91 ඇතුලු සියලු භාණ්ඩ රාජසන්තක කර තිබෙනවා. ලද තොරතුරකට අනුව මෙලෙස ඔහු ඊයේ ඔහුව අත්අඩංගුවට ගැනුණා.

ෆ්ලයි ඩුබායි ගුවන් සේවයට අයත් FZ 547 දරණ ගුවන් යානයෙන් මැදපෙරදිග සිට දිවයිනට පැමිණි අවස්ථාවේ මන්ත්‍රීවරයා අත්අඩංගුවට ගෙන ඇත්තේ ගුවන් තොටුපලේ ප්‍රභූ පර්යන්තයේදීයි. ඔහු සතුව තිබී අත්අඩංගුවට ගත් භාණ්ඩ සහ එම තොගයේ වටිනාකම වන්නේ,

  • රන් බිස්කට් (24kt) 13හි බර 1515.9g – වටිනාකම රුපියල් 32,212,875/=
  • රන් බිස්කට් (24kt) 1හි බර කිලෝග්‍රෑම් 1 – වටිනාකම රුපියල් 21,250,000/=
  • රන් පෙන්ඩන්ට් 22kt 135හි බර 584.1g – වටිනාකම රුපියල් 13,667,940/=
  • රන් වළලු 22kt 30හි බර 247g – වටිනාකම රුපියල් 5,779,800/=
  • රන් බ්රේස්ලට් 22kt 04හි බර 39.1g – වටිනාකම රුපියල් 914,940/=
  • රන් වළලු 22kt 02හි බර 11.1g – වටිනාකම රුපියල් 259,740/=
  • පෙන්ඩනයක රන් කැබැල්ලක් බර 0.5g – වටිනාකම රුපියල් 11,709/=
  • මුළු රන් බර ග්‍රෑම් 3397.7ක සම්පූර්ණ වටිනාකම රුපියල් 74,096,995/=
  • ස්මාර්ට් ජංගම දුරකථන 91හි සම්පූර්ණ වටිනාකම රු. 4,288,500/=

රේගු නිලධාරීන් අලි සබ්රි රහීම් මන්ත්‍රීවරයා අත්අඩංගුවට ගෙන පළමුව ගුවන් තොටුපලේ රඳවා ගෙන ප්‍රශ්න කිරීම් ආරම්භ කරා. අනතුරුව ඔහු කොළඹ රේගු මූලස්ථානයට රැගෙනවිත් පරීක්ෂණ ආරම්භ කර තිබුණා.

අලි සබ්රි රහීම්, මුස්ලිම් එක්සත් ජාතික සන්ධානය නියෝජනය කරමින් පාර්ලිමේන්තුවට පිවිසි මන්ත්‍රීවරයෙක්. ඔහු රිෂාඩ් බදියුදීන්ගේ නායකත්වයෙන් යුත් සමස්ත ලංකා මුස්ලිම් කොංග්‍රසයේ පුත්තලම දිස්ත්‍රික් සංවිධායකවරයාද වනවා.

රන් ජාවාරම වැළැක්වීමේ අරමුණින් කැරට් 22 ට වැඩි රන් ආභරණ ලෙස ගෙන ඒම සීමා කරමින් පසුගියදා අතිවිශේෂ ගැසට් පත්‍රයක් ද නිකුත් කෙරුණා. මෙම සිද්ධිය සම්බන්ධයෙන් ඊයේ පාර්ලිමේන්තුවේදී ද කතාබහට ලක්වූ අතර, එහිදී සමගි ජනබලවේගයේ පාර්ලිමේන්තු මන්ත්‍රී හර්ෂණ රාජකරුණා කියා සිටියේ මේ සම්බන්ධයෙන් විධිමත් පරීක්ෂණයක් සිදුකළ යුතු බවයි.

එමෙන්ම අදාළ මන්ත්‍රීවරයා වෙත මහජන උපයෝගිතා කොමිසමේ සභාපති ජනක රත්නායක ඉවත් කිරීම සඳහා වන පනත සම්මත කරවා ගැනීමට ජන්දය ලබාදීමට පැමිණෙන ලෙස දන්වමින් ආණ්ඩුව විසින් ඉරි තුනේ ලිපියක් යොමු කරනු ලැබුවා.

මීට පෙර 1978 වසරේදී ද හේවාහැට ආසනයේ පාර්ලිමේන්තු මන්ත්‍රී අනුර ඩැනියල්ස් ද මේ ආකාරයෙන්ම නීති විරෝධී රත්‍රං රැගෙන ඒමේදී රේගුව අත්අඩංගුවට ගෙන තිබූ අතර, පසුව ඔහුගේ මන්ත්‍රීධුරය ද අහිමි වුණා.

Share This Article
Leave a comment