ජාතික ජන බලවේගය විසින් සංවිධානය කරන ලද උද්ඝෝෂණයකට සහභාගී විම හේතුවෙන් අම්පාර ප්‍රදේශයේ, පොලිස් කොස්තාපල්වරයෙකුගේ සේවය අත්හිටුවා ඇතැයි වාර්තා වේ.
ජල හා විදුලි ගාස්තු ඉහළ දැමීමට එරෙහිව රජයට විරෝධය පළ කරමින් අම්පාරේ ගෝනගල හන්දියේ පැවති උද්ඝෝෂණයකට අදාළ පොලිස් කොස්තාපල්වරයා 2023 මාර්තු 26 වැනිදා සහභාගි වී තිබේ.
අම්පාරේ වෙල්ලවේලි පොලිස් ස්ථානයට අනුයුක්තව මෙම පොලිස් කොස්තාපල්වරයා සේවය කරන අතර මාර්තු 26 වැනිදා රාජකාරියෙන් නිවාඩු ලබා සිවිල් ඇඳුමින් සැරසී රජයට එරෙහි විරෝධතාවයට සහභාගී වී ඇතැයි වාර්තා වෙයි.
අප්‍රේල් 5 වෙනිදා සිට ක්‍රියාත්මක වන අන්දමට අදාළ පොලිස් නිළධාරියාගේ සේවය අත්හිටුවා ඇති බවත් මේ සම්බන්ධයෙන් විමර්ශනයක් ආරම්භ කළ බවත් පොලිස් මූලස්ථානය සඳහන් කරයි.