අලවතුගොඩ විලානපල්ලේගම ඇල්ලෙකඩේ ප්‍රදේශයේ දී ඝාතනය කළ ධනුකා මධුවන්ති (26) නැමැති 26 හැවිරිදි තරුණියගේ ඝාතනය සම්බන්ධ නඩුව අද (22) මහේස්ත්‍රාත් අතිරේක 1 අධිකරණයේ දී කැඳවිමට නියමිතව තිබේ.
ඝාතනය සිදුකර දින 11ක් යනතුරුත් ඝාතකයා අනාවරණය නොවුන සිද්ධියෙන් අනතුරුව මේ වනවිට ගම්වාසීන් දැඩි භීතියකින් පසුවන බවත්, ඔවුන් සවස් යාමයේ නිවෙස්වලින් එළියට යෑමට මැලිකමක් දක්වන බවත් ප්‍රදේශයේ ගැමියන්ගෙන් ලද තොරතුරුවලින් වාර්තා වේ.
ඝාතනය සම්බන්ධ ප්‍රධාන සැකකරුවන යුද හමුදා සෙබලා සහ එම ඝාතනයට සම්බන්ධයැයි සැක කරන පුද්ගලයින් පිළිබඳව අලවතුගොඩ පොලිසිය වැඩිදුර විමර්ශන සිදුකරමින් පවතින අතර අධිකරණ වෛද්‍ය නිලධාරීවරයාගේ සාක්ෂි සහ වෙනත් සාක්ෂි මත මළ සිරුරින් හමුවූ ජීව කොටස් සහ ආගන්තුක ද්‍රව්‍ය ඩී.එන්.ඒ පරීක්ෂණයකට යොමු කිරීමට අද අධිකරණ නියෝගයක් ලබා ගැනීමට නියමිතව ඇත.
මේ අතර ඝාතනය වූ ධනුකා මධුවන්තිගේ ඥාතීන් අසල්වාසීන් එක්ව ඇය ඝාතනය කර සඟවා දැමූ වෙල් යායේ සිට අලවතුගොඩ නගර මධ්‍යයට පා ගමනින් ගොස් අලවතුගොඩ සමන් දේවාලයට පැමිණ පොල් ගසා මේ අපරාධයේ ඝාතකයා සොයා දෙන ලෙස දේව කන්නලව්වක් කිරීමට නියමිතව තිබේ.
මරා දැමීමෙන්න අනතුරුව සිරුර නිවස අසල ඇති කුඹුරේ මඩේ ඔබා සිරුරට උඩින් ඇති මඩ මත ගොයම් ගස් ද සිටුවා තිබියදී පොලිසිය විසින් සිරුර සොයා ගැනුණි.
සිරුර හමුවන විට සිරුරේ තිබී ඇත්තේ ටීෂර්ට් එකක් පමණි. කාන්තාව මරණයට පෙර දූෂණය වී ඇති බවත් ගෙල සිරකර ඇයව මරා දමා මෙම ස්ථානයට රැගෙන විත් මඩේ ඔබා ඇති බවත් මූලික විමර්ශනවලින් හෙළි වී ඇතැයි පොලිසිය පවසයි.
මෙම මරණය ගෙල සිරකර සිදුකළ එකක් බවත් කාන්තාව ඇඳගෙන සිටි ඇඳුමේත් කාන්තාවගේ නියපොතුවල තිබූ කොටස් මෙන්ම යෝනි මාර්ගය තුළ තිබූ ද්‍රව්‍ය ඩී.එන්.ඒ පරීක්ෂනයකට යොමු කරන මහනුවර ජාතික රෝහලේ විශේෂඥ අධිකරණ වෛද්‍ය ශිව සුබ්‍රමනියම් විසින් සිය තීන්දුවේ දක්වා තිබේ.
කෙසේ වෙතත් සිද්ධිය සම්බන්ධ ඇසින් දුටු සාක්ෂි නොවීමත් දැනට අත්අඩංගුවට ගෙන ඇති සැකකරු අත්අඩංගුවට පත් වන්නේ පොලිස් නිල සුනඛ ඒකකයේ සුනඛයා ඉව පාරේ ගොස් ලබා දුන් ඉඟියක් මත වීමත් අත්අඩංගුවට ගත් සැකකරු ඝාතනය සම්බන්ධ සියලු සිදුවීම් ප්‍රතික්ෂේප කිරීමත් නිසා ඝාතකයා සොයා ගැනීම විද්‍යාත්මක සාක්ෂි තහවුරුව මතම තීරණය වීමට නියමිතව ඇත.